بدنا نعيش.. والزبالة لازمها ترحيل

طيب إذا كل هدول عايشين بالنعيم وبيوتو وحاراتو ومطاعمو وبسياراتهم المفيمة وما عم يشوفوا هالشوفات.. معقول ماعم تصلهم الروايح اللي صارت قاتلة كمان؟
بتمر بركن الدين، وخاصة بالشارع الفوقاني والحارات اللي بتوصل للجبل بتلاقي بين الزاروبة والزاروبة وع كل مفرق كوام زبالة.. والأحلى أنو المارين بيتفركشو فيها وبتنتشر وبتتوزع ع طول الحواري.. غير القطط اللي بينكشو فيها وغير الجرادين اللي بتطلع بالليل.. وبحارات الشيخ محيي الدين والشيخ ابراهيم نفس الحالة.. هيك لتوصل لحارات الجادات بالمهاجرين.. نفس المنظر ونفس الروايح.. كل هاد بالمنطقة الشمالية من الشام.. ومتلها بالمنطقة الجنوبية كمان ع نفس المنوال.. دويلعة والكباس ونهر عيشة والميدان والزاهرة..
وأكتر شي بمراكز انطلاق السرافيس والباصات تبع النقل الداخلي.. عينك ما تشوف إلّا الزبالة والقرف اللي فيها.. غير الروائح العطرة اللي بتهف هف مع نسايم الهوا.. هيك لتوصل لأقرب ريف، متل جرمانا اللي ما كانت تنحل قصة الزبالة فيها رغم أنو ع أساس تخصصت بمبلغ مرقوم مشان حل المشكلة بس لسا الحال متل ما هو.. زبالة وروايح وقرف..
طيب وين المصاري المخصصة مشان لملمة الزبالة يا عالم؟؟.
بتنزل ع الشوارع العريضة بقلب الشام وع الحارات الراقية فيها بتلاقيها أنظف طبعاً.. الفرق بالقصة أنو بالحارات المهمشة والفقيرة بتلاقي الزبايل ليل نهار فيها.. بينما بالشوارع الأرقى بالليل بس.. لأن وش الصبح بتجي السيارات بتلم الزبايل كلها.. وطول النهار بتشوف في عمال نظافة فيها عم يشتغلو كمان بتكنيس الشوارع ولملمة الزبايل منها..
طيب ليش بالشوارع العريضة والحارات الراقية في حاويات زبالة كتير، وفي ترحيل زبالة يومي وفي عمّال نظافة بالنهار كمان.. وببقية الحارات الفقيرة ما فيها لا ترحيل يومي ولا عمّال نظافة.. لك حتى الحاويات قليلة.. يعني هدول الناس اللي عايشين فيها ناقصهم فقر ونشح وتعتير فوق تعتيرهم.. وناقصهم أمراض وتكاليف عليها فوق طاقتهم..
يعني مو من قليل اسمها شوارع وحارات راقية.. ومو من قليل منقول أنو في خيار وفقوس بالبلد.. لك حتى بلملمة الزبالة.. والمصيبة أنو البلديات والمحافظة ولا كأنهم هون.. ولا أنا غلطان.. لك هون ونص.. وكلو بحسن إدارتهم ومعرفتهم كمان مع سبق الإصرار والتصميم..
ويمكن بكل المدن التانية ع نفس الحال أكيد.. زبايل وروايح وطناش.. وخيار وفقوس وع كل ضرس لون كمان..
لك إذا الزبالة لحالها صارت مشكلة عويصة بتبين الفرق بالتعامل الرسمي والتمييز بين الناس بهالبلد.. فكيف بالشغلات التانية اللي فيها تمييز وفاقعة أكتر..؟
بكل الأحوال، كل هاي الزبالة والروايح الكريهة، صار لازمها ترحيل وتطهير.. مشان نعيش متل الخلق والناس بهالبلد.. بلدنا كلنا.. يعني حاج تكون لناس وناس..