عطّال وبطّال الكلب والقط

القط: وكان الزمان زمان الخير.. تصور حكى لي جدي.. قال كان الرجال يمشي في الشارع ومعه سطل لبن ويمسكه هيك ويدلقه ع الأرض.. ويجوا لك هالقطط ويلحسوا .. ويلحسوا .. لحتى تصير الأرض عم تلمع لمعان..
الكلب: وأنا كمان حكى لي جدي .. قال كانوا يزتوا العضم على أبو جنب.. وكانت الكلاب تقعد تدور ع العضمة ما تلاقيه من قد ما في لحمة حواليها.. إيه.. اسق الله..
القط: كان اللحام يزين كيلو للزبون وكيلو للقطط.. شو لحمة.. هبر.. ويلحشهم ع الأرض..
الكلب: لا تشهيني .. مالك شايفني صاير جلدة على عضمة..
القط: ليش أنا أحسن منك.. طلع علي.. وروح شوف صورة جدي.. بتفكره نمر..
الكلب: آخ.. دلني على حل يا قط لولو .. متت من الجوع..
القط: بصراحة يا كلب أنا متلك..
الكلب: ليش نحنا بالذات جوعانين وأندبورية.. شوف هالقط ما أسمنه..
القط: وشوف شوف هالكلب اللقلوق قاعد عم بيلحوس بصاحبه وكرشه واصل للأرض..
متابعاً
القط: قال بيقولوا الكلب وفي.. ليش ما بيقولوا لقلوق.. مشان عضمة بيصير ممسحة..
الكلب: بس القط أكال نكار.. هيك بيقولوا.. مع أنو مو هيك.. في قطط عم بتصير مماسح أكتر من الكلاب..
متابعاً
الكلب: أخي الكلاب الجعارية مغضوب عليها.. وقطط الشوارع مغضوب عليها أكتر ..
القط: وشو الحل لنحسن من وضعنا الاجتماعي..
بحماس ثوري
الكلب: بدنا نعوي وننوي .. ضد اللي عم بيدعوسونا
خائفا
القط: ولي.. بيدعوسنا أكتر بعدين..
بشجاعة
الكلب: ما في غير هالحل.. لازم يسمعوا اصوتنا.. ويحسوا انو نحنا مو قبلانين بالوضع..
القط: يسمعوا صوتنا إي.. بس مو قبلانين بالوضع لأ..
الكلب: شلون بقى؟!..
هامسا
القط: بنعوي وبننوي.. بس معهم.. وكلما عوينا ونوينا أكتر.. بنسمن أكتر.. بس معهم..
الكلب: وشو عرفك.. أنت..
القط: شايف هالكلب.. ما أسمنه..
الكلب: العمى متل الدب..
القط: عوي عليه..
الكلب: هاو.. هاو.. هاو.. هاو..
صوت الكلب يرد على الكلب الآخر ولكنه نباح بصوت مبوح..
العمى صوته ما عم يطلع..
القط: أي هاد لأنه معوي عن عشرين كلب لحتى صاير متل الدب.. فهمت علي ..
الكلب: هاو.. هاو.. "بصوت عالٍ جداً" بس معكم ها معلم.. والله معك..
اشخاص أقوياء يضربونهما
القط: نياو نياو.. نياو.. "أصوات ضرب لهما".. معكم.. آخ.. لك معكم يا شباب..
الكلب: معكم.. معكم.. آاااخ...عم نعوي معكم ...