عطال.. و بطال المخبرون في الأرض

هو: ليش ما بدك تخليني أحكي بالسياسة..؟
هي: نحنا بمكان عام.. بلا ما هلأ شي مخبر ينتفنا تقرير يجيب فيه أجلنا..
هو: ودخلك المخبرين كتار عنا بالبلد..؟
هي: هو.. هو.. بعدد شعر راسك.. بيجوز تكون أنت مخبر وأنا مالي خبر..
 
معاتبا

هو: أنا؟.. ياعيب الشوم عليك..
هي: وشو فيها.. المخبر شغلة منيحة.. بيحافظ على أمن البلد..
 
مستغربا

هو: هيك رأيك؟..
هي: أي.. بس لازم يكون عنده ضمير.. يعني ما يتبلى الناس..
هو: شلون بقى..؟
هي: أحياناً بيوقف المخبر ليشتري خبز من عند أبو عبدو الفران.. وإذا ما سبّق له أبو عبدو بدوره بيروح بيسفقه تقرير بيعمل منه عميل خطير للسي آي إي..
هو: العمى.. معناها لازم المخبر ما يدخل حياته الشخصية بالشغل..
هي: مو بس هيك كمان.. في مخبرين وقت اللي بيفلسوا بصيروا بيكتبوا تقارير على عماها مشان يقبضوا..
هو: الحق ع الشعب.. لازم يديروا بالهم على المخبرين اللي بحارتهم وما يخلوهم يحتاجوا الفرنك..
هي: هيك الأصول.. بس أخي شعبنا ما فيه ذوق.. بيشوفوا المخبرين ميتين من الجوع وما بينتخوا..
هو: مظبوط .. أنا بعرف مخبر بحارتنا صار يشحد.. وقعد يكتب تقارير بالرايح والجاي بدون فائدة.. لأنو بالفرع ما عاد صدقوه.. قام جن.. وصار يكتب تقارير بالحيطان بالزفت بعواميد الكهربا..
هي: لك ببلدنا حتى المخبرين عايفين التنكة.. والله شي بيجنن..
هو: طبعاً لأنو الجهات المعنية بتقبل تقارير حيا الله..
هي: دخلك أنت شو بتعمل مشان ما تاكل تقرير..
هو: على اعتبار إني أندبوري وما بقدر أدفع خوة للمخبرين قررت أنا وأهلي أنو نسكت.. كل ما يزورنا شي مخبر نسكت.. ولا حرف .. ولا كلمة..
هي: أي.. وكتبوا فيكم تقرير..
هو: لأ.. بس سلخوا قطنا عنتر تقرير..
هي: لأنو أسمه عنتر؟؟
هو: لأ.. لأنو كان عم بينوي...