عطال وبطال معروض فرنكفورت

هي: هادا معرض كتاب.. كل سنة بيخصصوه لدولة مشان يعرض فيه كتبها من أدب وثقافة.. مثلاً السنة الماضية خصصوه للبرتغال.. قام اجوا البرتغاليين وشافوا مساحة المعرض وطلبوا مساحة إضافية لأنو كتبهم كتيرة وما بتوسع بس الألمان اعتذروا ..

هو: ونحنا العرب شو دخلنا بالقصة..

هي: الألمان السنة خصصوا المعرض لثقافتنا.. واتصلوا بالجامعة العربية قام الجامعة العربية.. اعتذرت وقالوا للألمان ما بدنا بس بعد ما عملنا طقس معروف عنا وهو الاجتماع..

هو: أي؟!.. 

ٍإعطاء أهمية لكلمة اجتماع

هي: قام الألمان اقنعونا وقالوا لنا لازم تقدموا ثقافتكم للغرب مشان يتعرفوا عليكم.. وهيك راحوا جماعتنا و "اجتمعوا" مثل العادة ووافقوا ع المعرض..

هو: أي؟!..

هي: وبعدين عملوا اجتماع جديد وشكلوا وفد وسافر لفرانكفورت وبلشوا يفحصوا مكان المعرض واستأذنوا من الجماعة الألمان واجتمعوا.. طبعاً الألمان وقع قلبهم وخافوا أنو جماعتنا يطلبوا مساحة إضافية يعني هدول 22 دولة مو لعبة..

هو: أي..

هي: المهم الجماعة خلصوا الطقس العجيب.. يعني الاجتماع.. وقالوا لهم للألمان.. يا أخي المكان..

هو: أي..

هي: قام الألمان فاتوا بالحيط وقالوا لحالهم العمى بدهم مساحة جديد أكيد وسألوهم.. شو به المكان.. قام جماعتنا قالوا لهم.. "كبير".. بدنا نلغي نصه.. قام الألمان قالوا لهم طيب شو بدك تعملوا بالنص اللي بدكم تلغوه؟!.. قام جماعتنا استأذنوا وعملوا اجتماع وبعدين قالوا لهم للألمان ولا يهمكم.. النص الملغي.. رح نعملة قاعة اجتماعات.. قاعة شو..

هو: أنا دوري بها الحلقة بس أقول أي؟!.. بس لا تزعلي.. اجتماعات..

■ لقمان ديركي