يوميات مسطول نحن من ربح الأولمبياد!!

والناس بتروح عالصين منشان تتفرج، وشي بيجلس عندنا قدام التلفزيون أيام قال شو؟! عم يتابع الأولمبياد.

ياجماعة ما هكذا تورد الأبل. شي أول بالمشي، شي أول بالنط! شي أول بضرب البوكس، شو هالمسخرة؟ تعوا شوفوا عندنا ما شاء الله، هون أبطال العالم!!

بطل العالم بالوصول للمليار الأول من عندنا.. ما شاء الله عليه، كان موظف بمكتب طيران، دبر رأسه وعمل شوية علاقات صار بظرف أربع خمس سنين ملياردير (سياحة).

بطل العالم بإفلاس المعامل من عندنا كمان، وفيه منه عشرات، كل سنة واحد منهم بياخد البطولة. بطل العالم في تنشيف بلده من عندنا. ماشاء الله. البلد فيها أنهار مياه تهدر كل يوم، منع ترشيد الاستخدام في الزراعة. نام على إدنه منشان جر المي من الساحل والفرات، وهلق العاصمة عطشانة والخير لقدام.

بطل العالم بنقص الطاقة من عندنا كمان، الهواء والشمس لحالهم بيكفوا البلد طاقة، وعم نشحد المازوت ونحرقه لنولد كهرباء.

أبطال العالم في تخريب الأراضي الزراعية حكر علينا. شي بندفن نفايات نووية، شي بنسقي الأراضي الزراعية من مياه المجاري، شي نستخدم مبيدات تلوث الأراضي.. إلخ.

أما البطل المطلق عالمياً في تخريب الاقتصاد فهو الدردري. بلد فيها أنشط شعب في العالم، يهاجر الفرد لأي بلد فيمسك اقتصادها. السوري وين ما نزل بأي طريقة بيصير الأبرع! ياجماعة عندنا العمل عبادة، وأرضنا غنية، وعندنا ثروات طبيعية من كل الأنواع بتعيش 100 مليون نسمة، إجا الدردري وعينك ماتشوف، بتعرفوا بدها شطارة هلق نحن بانتظار أن ينهار الاقتصاد بالكامل كل كام سنة. اقترح ترشيحه بطل دائم للعالم بتدمير الاقتصاد.