خبر عام وتعليق هام... الدعم كذبة وتشويه للقوانين الاقتصادية!

تعليق: بالبلد مو بس في تشوه بالقوانين الاقتصادية.. ومو بس الدعم تحول لكذبة كبيرة.. لك التشوه والشذوذ طال كل شي.. والسبب بكل هالتشوه والشذوذ والكذب اللي عم نعيشو وندفع ضريبته هي السياسات النهبوية المشوهة والظالمة..!!

يقول الخبر: «وزير الكهرباء: مشروع لخفض الرسوم والضرائب على استهلاك الكهرباء من 22,5% إلى 9%!».
تعليق: عجبي.. هلأ الأكيد أنو نسبة الضرائب والرسوم كبيرة ومرتفعة.. ويا ريت وقفت ع فاتورة الكهربا وبس.. لك كل الفواتير عليها ضرائب ورسوم بدها تخفيض.. بس يمكن الأسهل والأسرع ع وزير الكهربا أنو يخفض قيمة الاستهلاك نفسو بدل ما كل فترة يصدر زيادة ع التعرفة.. لأن تخفيض الرسوم بدو مرسوم.. والمرسوم بدو لجان.. وبعدين بدو حكومة.. يعني متل قصة البيضة والجاجة والقمحة والطاحون المسكرة..!!

يقول الخبر: «مدير المصرف العقاري: أكد أن الصرافات في درعا آمنة ولا يمكن أن تصعق كهربائياً ولكن المشكلة حصلت نتيجة تدلي السلك الكهربائي، بالتزامن مع الهطولات المطرية، أدت لصعقة كهربائية، مؤكداً أنه لم يسبق وحصلت حادثة مشابهة».
تعليق: إذا هيك بسيطة.. هلأ عرفنا سبب المشكلة أنو المتهم فيها السلك الكهربائي المتدلي والمطر الهاطل.. والمصرف مالو علاقة ولا مسؤولية.. ويمكن الأكتر من هيك يطلع المتهم هو المواطن اللي عم ينصعق بالكهربا.. لأن كان المفروض يسكت ويحمد الله أنو الكهربا صعقتو ليتذكر وجودها.. بسبب الشح الكهربائي المفروض عليه..!!

يقول الخبر: «أكد معاون وزير التربية رامي الظلي أن هناك أسباباً كثيرة مسؤولة عن تسرب الأطفال من المدارس منها: الأزمات التي أدت إلى تدمير البنى التحتية - محدودية التنقل - النزوح القسري والمتكرر - انعدام الأمن – خروج المدارس عن الخدمة، إضافة لأسباب اقتصادية منها الظروف المعيشية الصعبة وتدني المستوى المعيشي للأسر وعدم القدرة على تحمل أعباء وتكاليف المدارس، والاستفادة من دعم الطفل للأسرة بالعمل بدلاً من الذهاب إلى المدرسة».
تعليق: إذا عرف السبب بطل العجب.. بيبقى الحكي اللي ما نقال أنو كل هاد وغيرو كتيييير هو نتيجة للسياسات الحكومية الظالمة.. وخاصة سياسات الإفقار والتجويع والتهميش المستمرة.. وإذا استمر تغييب الحكي عن السبب الرئيسي.. معناتها ح تستمر نسب التسرب المدرسي بالازدياد.. وح تستمر كل الكوارث التانية بالبلد..!

يقول الخبر: «مدير أملاك الدولة في وزارة الزراعة حسان حاووط: هناك محاولة لأن يكون تأجير أراضي أملاك الدولة عن طريق المزاد، ليحقق إيرادات أعلى، وهناك توجه في هذا الإطار، مضيفاً: انطلقنا بالنسبة للعقارات من المناطق الواقعة داخل مراكز المدن، حيث يتم تأجيرها من خلال مزاد ويقدم العقار لصاحب السعر الأعلى، ونأمل أن تشمل عملية المزاد كل أراضي أملاك الدولة، فلها مردود أعلى».
تعليق: معلوم.. كل شي صار مباح بالبلد للمستثمرين بحجة الإيرادات.. طيب وين الدولة نفسها من استثمار أراضيها وأملاكها.. عاجزة ولا ما بدها ولا مصلحة المستثمرين أبدى؟!