خبر عام وتعليق هام..«التمديد لعـضو الهيئة التدريـسية بمرتبـة أستاذ بعد إتمامـه سن الـ 75»!

تعليق: أكيد ما حدا ضد استثمار إمكانات الأساتذة المخضرمين.. بس شو مشان الاستنزاف العمري وأنو السن ألو حقو كمان.. وليش ما تعملوا مسابقات لترميم أعضاء الهيئة التدريسية طالما عندكم نقص.. والله في كتير كفاءات عاطلة عن العمل وعم تنتظر فرصة..!!

يقول الخبر: رئيس الحكومة، الإدارة السورية حرصت على تسجيل الخصوصية السورية والاستفادة من المحنة التي مرت بها مؤسسات بلدنا وكتابتها كدروس مستفادة ليس على المستوى الوطني فحسب، بل سيذكرها كل مهتم بالإصلاح الإداري.
تعليق: أكيد يمكن استخلاص دروس مستفادة من خصوصية الإصلاح الإداري الحكومي.. يعني بيكفي نذكر المسابقة المركزية وشو صار فيها.. أو بالعاملين المتعاقدين بوزارة العدل وكيف بجرة قلم ظالمة صاروا مع العاطلين عن العمل بعد خدمات طويلة وخبرات متراكمة.. ويمكن الأهم كيف صار الفساد الصغير مستشري بالمؤسسات الحكومية.. فعلاً كل المهتمين ح يستفيدوا من دراسة هالخصوصية السورية..!

يقول الخبر: وزير الاقتصاد: هناك مجموعة من الإجراءات قسم منها تم القيام به، والآخر سيتم قريباً، تهدف جميعها لتعزيز قيمة الليرة السورية ودعم الإنتاج المحلي لكونه الحامل الأساسي للاقتصاد وحامي الليرة، إضافة إلى السعي لتخفيض العجوزات العامة للدولة.
تعليق: شفنا الإجراءات ولمسنا نتائجها الوخيمة.. الدولار الرسمي صار بـ10900 ليرة.. يعني الليرة تراجعت.. وزاد سعر المازوت والفيول الصناعيين بنسبة كبيرة.. يعني لا دعم إنتاج ولا يحزنون.. وتخفيض العجوزات طلعت من جيوبنا بزيادة أسعار المشتقات النفطية.. مشان الله لا تحكو ولا تعملو أي إجراء.. حاج الإنجازات اللي عملتوها لهلأ!!

يقول الخبر: وزير النفط: أي قرار يصدر من الحكومة تتم دراسته بطريقة شاملة ومعمقة ووافية، وتتم أيضاً دراسة تأثير هذه القرارات على الدخل والاستهلاك وعلى معيشة المواطن.
تعليق: العمى ولوووو.. إذا هيك عم يطلع معكم بعد الدراسة الشاملة والمعمقة.. فكيف بدون دراسة؟.. لك قراراتكم ساوت حياة المواطن جحيم.. الشي الشامل والمعمق والوافي الوحيد المطلوب هو انو نخلص من كل سياساتكم وقراراتكم دفعة وحدة.. وقتها بس يمكن للمواطن انو يرجع يعيش!!

يقول الخبر: عقد في يعفور برنامج للتدريب الحواري للقيادات الإدارية بمشاركة 42 معاون وزير، وكان من المحاضرين رؤساء الحكومة السابقين وائل الحلقي وعادل سفر.
تعليق: طيب شو ممكن نحصد من مزايا بعد هيك برنامج للحوار.. ما بدنا نحكي عن المحاضرين.. كانوا رؤساء حكومة منعرفهم ومنعرف خبراتهم الحوارية تماماً.. بس مقعول معاوني وزراء بدهم مين يعلمهم الحوار يا عالم..؟!