عطّال.. وبطّال أبطال التاريخ

هو: الجمهور بيحب التاريخ والشخصيات التاريخية.. طبعاً الجمهور العربي..
هي: أيوه.. يعني قصدك لأنو تاريخنا متل ما تفضلت مجيد..
هو: مو بس هيك.. كمان لأنو دايماً في بطل بيخلص الأمة من كل شي..
هي: وبالتالي .. نحنا بحاجة لبطل يخلصنا من وضعنا التعبان.. ومن تخلفنا..
هو: ومن تنبلتنا.. نحن شعب تنبل ما بنحب نعمل شي.. ودايماً بدنا واحد يشتغل بدالنا..
هي: وإذا صح لنا شي ملك أو بطل يحرر لنا القدس مثل صلاح الدين شو فيها؟!.. ليش ضد الفكرة أنت..
هو: يا حبيبي .. نحنا بحاجة لبطل يحكي عنا.. يقول شو هي مشكلتنا.. نحنا تنابل.. بدنا بطل يجلي الجليات عنا ويمسح البيت ويروح ع الشغل بدالنا ويوصل لنا الراتب ع البيت كمان..
تضحك
هي: وع الصرف ما في مشكلة.. نحنا بنحلها.. تخيل صقر قريش عم يصلح لك الكهربا بالبيت..
هو: ما عم أمزح معك.. نحن شعب لسه لهلأ ما بيعرف حقوقه.. مو واجباته حقوقه.. وبده حدا يحكي عنه.. يقل له شو حقوقه..
هي: وشو حقوقه؟!..
هو: شو بيعرفني.. اسألي الزير سالم..
هي: بتعرف جاي على بالي نرجع لأيام زمان.. أيام كانوا العرب حاكمين العالم..
هو: صدقيني هاد الزمن اللي عم نعيش فيه هو أحسن بكتير من أيام زمان ..
هي: لا تخيلني..
هو: يعني لو رجعتي  لأيام زمان شو بتستفيدي أنت ولا أنا.. ولا باقي الناس .. كنت بأحسن حالاتك جارية عند شي أمير.. وإذا شي يوم كان مزاجه معكر بيقطع لك راسك..
هي: وأنت كنت رح تكون شاعر البلاط..
هو: إذا المتنبي سمح لي..
هي: لا أخي.. خلينا عايشيين هلأ أحسن..
هو: بس شو بدنا نعمل..
هي: ولا شي .. بنفصفص بزر وبنتفرج على البطولات أيام زمان ع التلفزيون وبنتحسر ع هديك الأيام..
صوت من التلفزيون يأتي   
الصوت: انفحه ألف دينار
هي: شفت ليكه عطاه ألف دينار
الصوت :  ثم اقطع رأسه
هو وهي مندهشان

■■