خبر عام وتعليق هام... النقص الحاد في الكادر البشري يُشكل عائقاً كبيراً!
يقول الخبر: مدير المكتب المركزي للإحصاء: النقص الحاد في الكادر البشري يُشكل عائقاً كبيراً، وخاصة بعد هجرة عدد كبير من الكفاءات والخبرات العلمية، فمن 601 موظف في عام 2009 إلى 281 في مختلف المديريات التابعة للمكتب، ما انعكس سلباً على سير العمل.
تعليق: نقص الكادر البشري بالوظيفة العامة مشكلة معممة... بس مو صح انو الهجرة هي السبب... لان السبب الفعلي هي الرواتب الهزيلة.. وإذا استمر الوضع هيك يمكن ما يبقى ولا موظف أو عامل بالدولة... يعني ح تصير مؤسسات الدولة بح بسلامتك ما فيها حدا يشتغل...!!
يقول الخبر: الأمن الجــنائي يلقي القبض على الموظفة المسؤولة عن عملية جمع العلامات في وزارة التربية لطلاب الشهادات دفعة 2024 وتعترف بالتلاعب ببعض العلامات من أجل مبالغ مادية!
تعليق: يعني يعطيكم العافية... بس السؤال لوزارة التربية شو مشان طلاب الشهادات اللي صابهم ضرر ع حساب مستقبلهم من التلاعب... بعدين معقول مهمة جمع العلامات محصورة بموظفة وحدة وبس... وكانت هي المسؤولة عن التلاعب؟!
يقول الخبر: التأكد من سلامة أسطوانات الغاز ودقة وزنها لدى تعبئتها أهم الأمور التي ركز عليها وزير النفط والثروة المعدنية خلال تفقده اليوم معمل غاز عدرا بريف دمشق، اطلع فيها على سير العمل. وأكد وزير النفط على ضرورة تأمين وصول أسطوانات الغاز بشكل آمن وسليم وبالوزن المحدد إلى المواطنين.
تعليق: انشالله تكون نتيجة الزيارة ملموسة بالنسبة للمواطنين ويصير التزام بالوزن وبعوامل الأمان... بس الأهم بالنسبة الهم كمان انو مدة الاستلام ما تبقى طويلة لأن مدة 3 أشهر بين توزيعين كتير طويلة... وعم يضطروا يشتروها من السوق السودا بأسعار كاوية...!
يقول الخبر: مدير فرع المؤسسة السورية للمخابز بدمشق: جودة الخبز جيدة جداً لدى أغلب مخابز دمشق ويتم العمل على نقلها إلى ممتازة في كل أفران دمشق.
تعليق: لك والله في مبالغة بالحكي انو جودة الخبز جيدة جداً... يعني فيك تقول مقبولة أو لا بأس فيها مو أكتر... لأن إذا هيك الجيد جداً بالنسبة الكم فكيف الرديء والسيئ؟!!
يقول الخبر: قال مدير شركة النقل الداخلي عبر شام_إف_إم إن دمشق مدينة مزدحمة كونها العاصمة وأغلب المؤسسات والوزارات متمركزة فيها، بالتالي سيتواجد الناس بها، خاصة خلال أوقات الذروة بين الساعة الـواحدة والثالثة ظهراً، يتجمع الناس في مراكز الانطلاق ما يؤدي إلى حصول ضغط على وسائل النقل... هناك أزمة نقل بين دمشق وريفها، إلى جانب أن انخفاض التوريدات أثّر على تواتر الرحلات... شركة النقل الداخلي وضعت كل إمكانياتها على شبكة خطوط النقل في دمشق وهناك تواصل مستمر لمعالجة أي ازدحام.
تعليق: يعني التوصيف والشرح كتير ظابط... علماً انو ما في شي جديد كل الناس بتعرف توصف وتشرح... بس كيف ح تنحل قصة التوريدات اللي تعتبر من أسباب الازدحام... غير العذر غير المباشر انو شركة النقل عملت اللي عليها... يعني المشكلة ح تستمر...!!
يقول الخبر: نائب محافظ دمشق: المكان البديل لبسطات الكتب التي أزيلت من تحت جسر الرئيس هو خلف وكالة سانا بالقرب من جامعة دمشق.
تعليق: هلأ ما ح نحكي عن بسطة الكتب تحديداً ومكانها البديل... بس الواضح انو حملة المحافظة ع البسطات عموما ما غيرت شي... لأن لسا الوضع متل قبل... والسبب الرئيسي انو الأماكن البديلة للبسطات لهلأ ما صار فيها شي... طيب شو يعملوا صحاب البسطات... وكيف بدهم يعيشو مع عائلاتهم... يعني مو معقول تقطعوا بأرزاق العباد وتلاحقوهم من مكان لمكان بدون بديل...!!
معلومات إضافية
- العدد رقم:
- 1198
