خبر عام وتعليق هام... انخفاض الثروة الحيوانية 30% من الأغنام و40% من الأبقار!

تعليق: لك شو هالأرقام الكبيرة المرتبطة بالأمن الغذائي... وشو عم تعمل وزارة الزراعة والحكومة مشان تعويض النقص بالقطعان أو مشان تكلفة التغذية المرتفعة إلها.. وهي بنفس الوقت مستمرة بتخفيض الدعم ع الإنتاج الزراعي... وبعدين وين الحكومة من قصة التهريب... لك الأرقام والواقع والوقائع كلها عوامل إدانة للحكومة... ورغم هيك ما حدا لحدا والجوع صار ضارب أطنابه!!

يقول الخبر: عميد كلية العلوم في جامعة دمشق: لدى كل قسم، مخبر خاص، وأكد وجود نقص في الكادر والمشرفين وتحديداً المخبريين. هناك النية والرغبة لافتتاح أقسام دقيقة وجديدة، معبراً عن أمله بافتتاح قسم لعلوم الدراسات الفضائية، مؤكداً أنه أصبح ضرورة ملحة.
تعليق: واوووو.. دراسات فضائية دفعة وحدة!!! يعني إذا المخابر مو كافية.. وفوقها في نقص بالكادر والمشرفين والمخبريين.. فكيف إذا صار في أقسام جديدة؟! وكيف ح يكون قسم العلوم للدراسات الفضائية بحال تنفذت هالنوايا والرغبات؟! لأن الأكيد ما ح تبعتو الطلاب للفضاء وح يكونو بحاجة لمخابر نوعية... يمكن الأولى نطلع من تحت الأرض قبل الحكي عن الفضاء... مو هيك؟!

يقول الخبر: كشف مصدر في وزارة الكهرباء أنه يتم العمل على استثمار أموال الصندوق التعاوني العائد للعاملين في الوزارة والمقدرة بنحو 1,4 مليار ليرة بمشروع لإنتاج نحو 100 كيلو واط من الكهرباء، وحالياً يتم الإعلان عن مناقصة خاصة لهذا المشروع المقرر تنفيذه في منطقة الكسوة في ريف دمشق.
تعليق: هلأ إذا المشروع مربح كاستثمار فليش وزارة الكهربا نفسها ما بتنفذه؟! ولا لأن القصة من مصاري العاملين فإذا طلع خسران معليش! الاحتمال الأول سيّئ وبينحسب ع الوزارة طبعاً.. بس الاحتمال التاني مصيبة بالنسبة للعاملين وحقوقهم بالصندوق!!

يقول الخبر: وزير الكهرباء: تم إنشاء أول مشروع تشاركي مع القطاع الخاص، كما تدرس الوزارة إمكانية إنشاء هيئة توليد الطاقة الكهربائية.
تعليق: طيب وين تفاصيل المشروع التشاركي؟ وشو ح نستفيد نحنا كمواطنين منه؟! ولا هاد المشروع التشاركي سر عظيم ممنوع معرفة تفاصيله؟! وبعدين شو فائدة انشاء هيئة جديدة باسم هيئة توليد الطاقة الكهربائية إذا كانت الكهربا غايبة غالبية الوقت... يعني بلاها هالتكلفة الجديدة ع حسابنا وع حساب البلد... يعني إذا بتستعينوا بكم قابلة لتوليد الكهربا يمكن أحسن!!

يقول الخبر: بين معاون وزير الموارد المائية أن المتجدد المائي الوطني يبلغ نحو 16,2 مليار متر مكعب سنوياً، في حين بلغ الاستهلاك المائي نحو 17,7 مليار متر مكعب سنوياً، نتيجة لتنامي احتياجات التنمية، أي إن هذا الاستهلاك يفوق المتجدد السنوي، ويتسبب بعجز في الميزان المائي يصل إلى نحو 1,5 مليار متر مكعب سنوياً على المستوى الوطني!
تعليق: هلأ ما ح نحكي عن العجز المائي الكبير برغم أنو كبير وقديم ومزمن وبدون حلول جدية... بس المستغرب هو الحكي عن تنامي احتياجات التنمية لتبرير هالعجز المائي... بالوقت عم تسجل فيه الزراعة والصناعة تراجع سنوي ملحوظ ما بيخفى ع حدا... فوين هي التنمية ومشاريعها اللي عم تبلع المي وتعمل عنا عجز.. يعني اشرحولنا أكتر والله منفرح بهيك تبرير وما منزعل!!