خبر عام وتعليق هام ... دمشق تعتزم التقدم بطلب الانضمام إلى تكتل «بريكس»

يقول الخبر: انطلاقاً من أهمية البحث العلمي لمواكبة التطور في الميادين كافة لا سيما القانونية منها، تعلن وزارة العدل عن مسابقة علمية لاختيار أفضل بحث قانوني لعام 2023 في مختلف فروع القانون.
تعليق: حلو الحكي الرسمي عن الأبحاث العلمية القانونية ويكون في إلها مسابقات كمان.. أصلاً في كتير عناوين قانونية خرج ينعمل عليها أبحاث جدية عنا بالبلد.. متل انهاء عقود الموسميين بالوزارة بجرة قلم.. أو بدعة اللصيقة القضائية مشان تغطية عورة أجور القضاة.. أو سنين التقاضي الطويلة بالمحاكم.. أو التكاليف المرتفعة للتقاضي اللي ع أساس في ضمانة دستورية أنو مجاني.. وفي كتير عناوين قانونية خرج ينكتب عنها مجلدات مو أبحاث..!

يقول الخبر: محافظة دمشق: الساحات التفاعلية الخاصة بأصحاب البسطات ستكون بالخدمة بعد عيد الأضحى.
تعليق: ساحات تفاعلية عنوان جميل بس مو ممكن يخبي ويغطي القبح.. لأن اللي شلتو بسطاتهم من أكتر من شهر صاروا عاطلين عن العمل وجاعوا مع ولادهم بسببكم.. واللي ح يستفيد من ساحاتكم التفاعلية هو كل طويل عمر بسبب الواسطات والمحسوبيات والإكراميات.. بعدين لشو العجلة لبعد العيد ع مهل.. كون البسطات رجعت.. وزادت قبل العيد.. عووووجة!!

يقول الخبر: حدد المكتب التنفيذي لمحافظة دير الزور سعر بيع قالب الثلج وزن 20-25 كغ بمبلغ 6 آلاف ليرة والقالب وزن أقل من 20 كغ بمبلغ 4 آلاف ليرة.
تعليق: هاد مي يا جماعة.. لشو كل هاد.. واللي صاير أنو السعر أعلى من هيك وما حدا داير ع التسعيرة النظامية.. والسبب بكل بساطة هي تكاليف الكهربا.. والبرادات عم تشتغل ع المولدات.. ومع هيك صحابها بيقولوا أنهم خسرانين.. لك حتى شريك المي بالبلد صار خسران..!!

يقول الخبر: مدير كهرباء دمشق: مشكلة بالتوليد والبرنامج ساعة وصل مقابل 6 قطع.
تعليق: لك شيلونا من تبريراتكم الصميدعية اللي ما عاد تخرط المشط.. بتشتغل المحطات بتنقص المحروقات.. بتتوفر المحروقات بتتعطل المحطات.. بيجي الصيف بتزيد ساعات القطع.. بيجي البرد بتنقص ساعات الوصل.. خيو من الآخر قولوا ما بدكم تعطونا كهربا بصريح العبارة وريحونا.. العمى ولوووو والله صار الوضع أكتر من مقرف.!!