خبر عام وتعليق هام «أصبح المستوردون يربحون 50-60%»!

تعليق: شيلنا من العزايم وخلينا بالأهم.. 50% ربح هو الكفر بعينو.. علماً انو الأرباح أكتر من هيك بكتيييير.. فعن أي خوف من القادم عم تصير هالحسابات.. لك حيتان الاستيراد بلعو الماضي والحاضر والقادم سوا.. وكلو من جيوبنا وع حسابنا.. والأهم انو كلو بمعرفة الحكومة ودعمها..

يقول الخبر: مدير هيئة دعم الإنتاج المحلي والصادرات: نصدر الفائض من الإنتاج فقط ولم تنقطع أي مادة من الأسواق بسبب التصدير.
تعليق: شفنا نتائج تصدير الفائض بعينا.. ودفعنا ضريبو من جيبنا.. وما نسينا قصة تصدير البصل وعمليات الاستيراد اللي صارت بسعرها المرتفع ونوعها الرديء.. ولا سعر الثوم هلأ اللي وصل لـ10 آلاف ليرة بحجة التصدير.. فقصة فائض الحاجة صارت مكرورة ومعروفة أنو لمصلحة كم حوت بالنتيجة وع حسابنا..

يقول الخبر: أعلن عضو المكتب التنفيذي لمحافظة حلب أن المجموعة الأولى في محطة حلب الحرارية التي تمت إعادة تأهيلها، تعرضت لعطل بمجموعة التوليد خلال فترة التجريب وبعد إدخالها للشبكة، وتحتاج إلى صيانة لمدة 3 أشهر.
تعليق: هاد كان خبر كتير بسيط ومر مرور الكرام.. لك ما صدقنا انو اشتغلت المحطة رجعت تعطلت.. وفوقها بدها لسا 3 أشهر صيانة.. فبالرغم انو نحنا ما استفدنا من التشغيل ولا حسينا بأي فرق ع مستوى ساعات الوصل.. بس التعطل والصيانة يعني تكاليف جديدة بدها تطلع ع حسابنا ومن رقابنا.. غير حصص النهب طبعاً..

يقول الخبر: رئيس غرفة صناعة حمص لبيب إخوان: 95% من المكلفين متهربين ضريبياً.. والسبب أن القانون مُجحف!
تعليق: معلومة التهرب الضريبي مو جديدة أكيد.. من يومهم كبار المكلفين متهربين.. واللي بياكلوها هنن الصغار.. والأسهل من كل هدول هنن أصحاب الأجر اللي بتنسحب منهم الضرايب المباشرة وغير المباشرة بالنتيجة.. بس المجحف مو القانون يا حبيبي.. السياسات الضريبية هي المجحفة.. لك وكل السياسات مجحفة وظالمة إذا بدك..