خبر عام وتعليق هام.. «توقف العملية التعليمية في مدارس بعض القرى بـريف سلمية الشمالي»

خبر عام وتعليق هام.. «توقف العملية التعليمية في مدارس بعض القرى بـريف سلمية الشمالي»

يقول الخبر: «توقف العملية التعليمية في مدارس بعض القرى بـريف سلمية الشمالي، وذلك جراء عدم السماح لأصحاب «السرافيس» بنقل المعلمين من سلمية إلى تلك القرى، لعدم وجود مخصصات مازوت، وإيقاف موافقات العقود لهم من قبل المحافظة، بحسب قول السائقين».

تعليق: اطلبوا العلم ولو بالصين.. بس مو بسورية... لك كل العالم لقدام إلّا سورية، مليون سنة لورا من التجهيل منشان الحرامية يلي جواتها ويلي ع أساس عم يشتغلوا بالبلد يشبعوا نهب وسرقة.. وكلو ع حساب العالم والجيل يلي عم يطلع... الله يريحنا منهم...

يقول الخبر: «الهيئة الناظمة للاتصالات: يُمنع استخدام الطائرات المسيّرة «درون» دون الحصول على التراخيص والموافقات اللازمة وذلك تنفيذاً لبلاغ رئاسة مجلس الوزراء الخاص بمحددات وإجراءات إدخالها وترخيصها واستخدامها».
تعليق: زبدة الكلام عزيزي المواطن والمهم عندن هو الفلوووووووس... الفللوووس والدفع يا روحي.... يلي عم يشتغل شغلو الخاص بدو يضل يدفع ع الطالع والنازل.. ويلي عجبوا عجبوا ويلي ما عجبوا.... ع راحتو..

يقول الخبر: «محافظ دمشق، سيبدأ يوم الأحد بتاريخ 2 الشهر تطبيق نظام التتبع الإلكتروني لوسائل النقل العامة، والبداية ستكون على ثلاثة خطوط، مع إضافة خط جديد كل يومين، تم تركيب أجهزة الـ GPSلـ 6300 آلية من أصل 8500 بدمشق، وسيتم تزويد كل آلية بالمحروقات على حسب المسافة التي تسيرها مع الانتهاء من تطبيق هذه الآلية على كل الخطوط، ستنتهي أزمة المواصلات في دمشق بشكل كامل، لأن الآليات التي كانت خارج الخطوط، وتستفيد من المحروقات المدعومة دون استعمالها للنقل، لن تحصل عليها إلّا لتخديم المواطنين».
تعليق: طيب شو هنن الخطوط التلاتة بلا كترة غلبة يعني!!... طيب مراقبين الأجهزة رح ينشروا متل ما انشرى يلي قبلن ولا شو الترتيب؟؟ لأنو كل الحلول الخُرندعية ما عم تكون إلا بوابة رزق لبعض الفاسدين والناهبين.. هيك تعودنا من كل الإجراءات الرسمية.. بالنهاية يمكن تنتهي المواصلات في دمشق بشكل كُلي.. ويمكن هاااا يمكن نرجع لأيام الحنتور والحمار أجلكن... متل ما رجعونا للفانوس والكاز والحطب والجلة..

يقول الخبر: «وزارة النفط بدء التشغيل التجريبي لضواغط معمل غاز جنوب الوسطى بحضور وزير النفط، ويتوقع أن يبدأ العمل الفعلي للضواغط خلال أسبوعين».
تعليق: مشكورة جهودكم... بس المواطنين العادين يعني أغلب فئات السوريين شوح تكون حصتن من هل الضواغط؟؟؟ بمعنى قديش المدة الزمنية يلي بتصير تحقلوا أنو يحصل فيها ع هل العروس بطلتها البهية يلي اسمها الكهربا؟؟ وقديش حتكون تكلفة الكيلو واط تبعها؟ مو منشان شي بس كرمال نهيئ جيبتنا ونفسيتنا ولووووو...

معلومات إضافية

العدد رقم:
1090