خبر عام وتعليق هام «انخفاض غير مسبوق لتوريدات الغاز.. وتراجع إنتاج الكهرباء إلى 1900 ميغا فقط!»

تعليق: لك ملينا من تبريراتكم وذرائعكم اللي بتنعاد كل مرة.. يعني ع أساس كان في كهربا بالأصل.. لك هي وقلتها كم دقيقة وصل كل كزا ساعة قطع.. وهاد هلأ هيك.. بكرا بس تدخل الشتوية شو ح يصير.. بعدين مو ع أساس انو الغاز تبع المولدات من الإنتاج المحلي مو استيراد.. طيب وين راح الغاز؟؟! واللي بيزعج أكتر من كل هاد أنو ما في كهربا بس في فواتير.. وما في كهربا بس في وزارة اضرب واطرح باسمها.. العمى ولوووو.. والله تخينة..

يقول الخبر: «أشار مستشار وزير الزراعة لشؤون الحراج إلى أن حركة التحطيب لم تتوقف حتى خلال أشهر الصيف، وهي عبارة عن تعديات على الحراج يتم ضبطها ضمن القانون».
تعليق: بالتأكيد هاد العمل مو منيح وأذى للغطاء النباتي.. وأكيد إلو عواقب وخيمة ع البيئة... والأكتر تأكيداً أنو متل هيك عمل في وراه تجار وحيتان عم تستفاد منو ع حساب المحتاجين للدفا من المواطنين اللي ما بقيلهم حل تاني ليحميهن من قرصات البرد وأمراضوا... يعني ياريت تعالجوا هالمصيبة من شرشا مو من أوراقها..

يقول الخبر: «وزارة الداخلية السورية ترفع بدل رسوم إصدار جواز السفر الفوري إلى ٥٠٠ ألف ليرة سورية».
تعليق: ع مبدأ إن لم تستح... ويلي عجبوا عجبوا ويلي ما عجبوا.. يعني استغلال وزايد عن حدو كمان.. لك وكأنهم متمسكين بالناس ما تطلع برات البلد.. رغم كل شي فيها بيخلي الواحد يطفش منها.. وع ايدين الحكومة واللي وراها من الناهبين والمستغلين.. لك عم يطفشونا وبدهم يخلونا لينهبونا.. وكيف بدهم يحلو هالمعادلة العويصة ما عم يعرفو؟؟!!

يقول الخبر: «ارتفعت قيمة التعرفة الجمركية للموبايلات في سورية بنسبة تراوحت ما بين 40– 50 %، من دون أي إعلان رسمي من قبل الجهات المعنية».
تعليق: كأنو صارت قصة وسيرة كل فترة بيرفعو الجمركة... لأن عملة كب عند هل المشحرين يلي اسمن سوريين... لك إذا ارتفعت جمركتو 40 أو 50 أو 100 بالمية.. أعلنو ولا ما أعلنو.. مين معو من هل المشحتفين يحط ليرة من المبالغ الكبيرة تبع الجمركة وخصوصاً ع الأجهزة تبع الملايين، وهو يا دوبوا مو قدران يطعمي ولادو.. بس بتبقى العترة ع اللي وصلو شي جهاز هدية.. واللي ح يضطر ما يشغل عليه شريحة.. وليش لأ.. كبار حيتان النهب بالبلد يلي مالها تعبانة بمصرياتا عم تتهرب من الضرايب أصلاً.. فما ح توقف ع هالمعتر.. مو هيك سيد راسي!