خبر عام وتعليق هام

التعليق: يعني كل الأزمات نفس الشي صارت... كلشي موجود عنا بس حر؟؟ وهيك صارت الحكومة هي الراعي الأساسي للسوق السودا...

الخبر يقول: «وزارة الداخلية حرصاً على تلبية رغبة الإخوة المواطنين في الحصول الفوري على خدمة جواز السفر يستوفى بدل خدمة ورسم بمبلغ /100,000/ ليرة لقاء الحصول على جواز السفر الفوري، ويسلم الجواز لصاحب العلاقة بنفس اليوم».
التعليق: يعني ع أساس وفرتو ع هل المواطن اللي معو دفع مئات آلاف بالرشوة والاكتفاء بـ 100 ألف ليرة رسمية فقط؟ طيب أزمة الجوازات الأساسية للي ما معو هيك اختفت فجأة ولا لسا موجودة؟ علواه يكون في لمسات سحرية لتختفي كل هل الأزمات يلي معيشينا ياها بدون التفريق بين اللي معو واللي ما معو..

الخبر يقول: «تدرس اللجنة الاقتصادية في مجلس الوزراء تحديد الشرائح الميسورة التي يمكن استبعادها من البطاقة الإلكترونية يهدف إيصال الدعم لمستحقيه، وذلك وفق بيانات وقواعد معلومات دقيقة».
التعليق: شرائح ميسورة قلتولي؟؟ بسورية عنا شريحتين يا حرمية- زنكيلة يا مفقرة- مسحوقة... وعقبال ما ينسحق كل حوت من هل الحيتان... وبربكن حاج تدرسوا طالما النتيجة وحدة وهي الرسوب..

الخبر يقول: «كشف نائب مدير المؤسسة العامة لنقل وتوزيع الكهرباء أن الشتاء الحالي سيكون قاسياً ولا يوجد أي عامل يدعو للتحسن والظروف صعبة، وكلما زاد الطلب على الكهرباء ستكون هناك زيادة بعدد ساعات التقنين».
التعليق: وعلى أثر هل التصريح منشوف كيف خلصنا من الكهربا وما عاد شفناها بالمرة.. دخلك عندك حكي غير إنو سيكون الشتاء قاسياً وسيكون الصيف قاسياً؟ لك صرنا عم ندفع حق قطع الكهربا مو حق وصلها..

الخبر يقول: «أكد عضو المكتب التنفيذي لقطاع المحروقات في محافظة ريف دمشق أنه لوجود قلة في مادة الغاز المنزلي ممنوع ومن غير المفروض استخدام الغاز عوضاً عن المازوت للتدفئة، مشيراً إلى أن الغاز المنزلي للاستخدامات المنزلية والصناعية وليس للتدفئة كي لا يتسبب المواطن بضغط على كمية الغاز».
التعليق: عنجد هل الشعب مدري كيف بيفكر... كلشي موجود ومن أحسنوا عنا.. الكهربا للإنارة والمازوت للتدفئة والغاز للطبخ والقهوة والذي منو... يعني يا شعب بيكفي تعمل أزمات للحكومة!!

الخبر يقول: «سجلت أسعار الفروج ارتفاعاً ملحوظاً بسبب وقوعنا بين موسمين من مواسم إنتاج الفروج وهو أمرٌ يحصل كل عام. ولهذا قررت السوريّة طرح الفروج في صالاتها المجهزة بسعر ٧٥٠٠ ليرة كتدخل إيجابي في السوق ريثما يبدأ الموسم القادم».
التعليق: ببعض المدن والضيع عم ينباع بـ 5000 و6000 بالمناسبة... وهيك منشوف التدخل الحكومي الإيجابي طلع أعلى من السوق... يعني النتف الحكومي وغير الحكومي شغال بالمواطن مو بالجاج..