الوزارة اللي ما بتعرف المجانية بخدماتها

على وحدة من الصفحات صار حوار من وحي شخصيات المسلسل الكوميدي الشعبي «ضيعة ضايعة» يقول:
عادل: أبو نادر سيدي، المواطن عم يستخدم الـ «VPN» ببلاش.
أبو نادر: حسان اعتقلّي المواطن.
ولاه أخوّي المواطن، عم تعاني من السرعة بشبكة الإنترنت بالفترة الأخيرة وزاد الوضع سرعةً مؤخراً، وفوق كل هالسرعة بالإنترنت عم تستخدم الـ «VPN» ببلاش.. «لعما فعيون عيونك ما عاد شبعت»؟؟
اعتبرت وزارة الاتصالات والتقانة كاسر البروكسي الـ «VPN» المجاني (مفتوح المصدر) بأنو عم يسّهل اختراق خصوصية المستخدم، وحذّرت المواطنين مستخدمي هالنوع منها، طبعاً لأنها الأكتر شيوعاً باعتبارها مجانية.. وبأنها بلشت تروّج وتمهد لعرض برامج الـ «VPN» المأجورة (المقفلة)، بس حرام ما ننسى أنها شرحت للمواطن بأنو النوعين بيستخدمو التقنية نفسا، إلا إنو الأكتر انتشار هي البرامج المجانية (وأكيد لأنها مجانية)!! على أساس أنو هالمواطن معو ياكل ليكون معو حق البرامج المأجورة..
بلشت وزارة الاتصالات تحكي عن سلبية البرامج المجانية، ووضحت (يعني فهمت هالمواطن نفسو) بإحدى صفحات فيسبوك عن آلية عمل هالبرامج بإنو: «تقوم بإنشاء قناة «مشفرة» تسمى «النفق»، بين جهاز المستخدم وبين المخدّمات اللي بتقدم الخدمة، ليتم منح المشترك عنوان (IP) يمكنه من تغيير هويته والهروب من السياسات اللي بتطبق ع الشبكات اللي بتقدم خدمة الإنترنت.. وكأنو هالحكي مو معروف عنا أبداً!!
بس السؤال اللي مو معروف هون: ليش عنا نحن بالذات دون الدول التانية اللي صار فيها مشاكل ببعض وسائل التواصل متل: «الواتساب، مسنجر... إلخ» وخلت العالم كلها تضطر لاستخدام كاسر البروكسي.. هيك يا غافل إلك الله؟؟!!
بس قلبون حنون وما بيهون عليهون ينضحك ع المواطن.. لهيك خوفاً عليه وعلى أمان «السيكيورتي» العالي لـ «الداتا» الخاصة فيه حذرتو من هالبرامج اللي ممكن تبعت فيروسات ضارة ع جهازو وتعرضو لقرصنة معلوماتو الهامة، أو تبعت حصان طروادة (التروجان) ليفترس جهازو.. بالإضافة للخطر الأكبر اللي ممكن يتعرضلو وهو: إرسال رسائل دعائية على حزمة الإنترنت المخصصة لحضرتو.. اللي حيسبب البطء بحسب ما ذكرت الوزارة.. «الله يسامحون ع هالجملة حسسونا إنو في إلنا حزمة إنترنت خصّ نصّ لإلنا.. والأنكا من هيك اللي بدو يقرأ تصريحن أكيد رح يطرقنا بالعين.. مع إنو قسماً بالله ما حسينا في إلنا حزمة مخصصة بالأساس!!».
وشرحت للمواطن كمان إنو المشترك بالسرعة الأكتر من 2 ميغا (قصدون اللي طلب اشتراكو 2 ميغا وفوق لأن من النوادر تلتقى عنّا) استخدامو لهالبرامج رح يسبب بتخفيض السرعة لأقل من 2 ميغا، لأنو هالبرامج طعمها شديد ودققو ع مصطلح «طعمها شديد» لأنو مصطلح جديد نازل ع السوق وشكلنا رح نسمعو كتير بالأيام الجاية.. خاصة وقت الواحد بيضطر ليشترك بالنت عن طريق شبكات الخليوي.. أو وقت بيسمع أنو الاتصالات نفسها عم تروج للباقات المسقوفة بالمستقبل القريب..
منشور الوزارة ما حكى بس عن البلاوي السودة اللي عم يسببها الـ «VPN» المجاني.. وحكى كمان عن إمكانية الاتفاق بين المشترك والشركة التي رح تقدم الـ «VPN» المدفوع (المغلق) حول السعر والسرعة.. وحماية بيانات المشتركين (يعني بما معناه: عزيزي المشترك ادفع ونمْ مطمئن البال.. لا فيروس حيصيبك ولا حصان طروادة بيلطيلك والمواقع بتفتح قدامك متل الفريرة).. أي يا هيك الضحك ع اللحى يا بلا..
بس للأمانة عجبني تعليق حدا من هالمواطنين: «بالظاهر الوزارة افتقرت كتير لكلمة «مجاني» بخدماتا ومنشورات صفحتا، فاشتاقت لهالكلمة وكررتا كتير».. ما علينا..
المهم: ولاه أخوّي المواطن، عرفت شو سبب تدني سرعة النت؟ هو استخدامك لبرامج مجانية.. يعني هالمرة ما زبطت معك كلشي ببلاش استخدمو! لهيك بطّلو تنقو مفكرين في شي بهالبلد ببلاش؟؟
وأنت عزيزي الـ «VPN» المجاني: يا ضيعان العشرة والليالي والسهر معك، نحن مسلمينك بياناتنا وأملنا إنك تفتح كل المواقع اللي حاظرها الغرب عنا.. والبرامج اللي مدري ليش فجأة ما عاد فتحت عنا.. وتحسن شوي من قرف النت عنا.. بتطلع عم تسرقلنا السرعة وتخربلنا أجهزتنا فوقا!! يا عيبشوم عليك بس..
عنجد عنجد يا محلى القرش وعضاتو!!أعلى النموذج