خبر عام وتعليق هام

التعليق: طيب ممكن يكون حلو هالحكي... بس اللي ما قلتو أنو بالأصل زاد الخصم التأميني الشهري ع هالموظف المعتر.. والسؤال: يا ترى مقدم الخدمات ح يلتزم بالموضوع كرمال يضحك ع حالو وينبسط بالتأمين في ظل هل الارتفاعات يلي عم تصير؟؟

الخبر يقول: «اعتباراً من 25/12/2021 سيتم البدء بالعمل بآلية جديدة لتوزيع مخصصات الخبز التمويني على البطاقة الإلكترونية وفق الشرائح المستهدفة دون التغيير على مجموع المخصصات، الأشخاص الذين يحصلون على ربطة واحدة كانوا يشكلون ازدحاماً من خلال توجههم بشكل يومي للأفران، أما بالآلية الجديدة سيحصلون على مخصصاتهم كل يومين في الأسبوع (ربطتين بكيس نايلون واحد)». مع إرفاق جدول التوزيع المعتمد..
التعليق: يعني مثلاً، يلي بيطلعلوا 3 ربطات يوم الخميس بياخد الربطتين بكيس والتالتة وحدانية بتضل؟ ولا بتحطوها بكيس لحالها؟ ولا بتجمعولن هل الربطة مع الخميس التاني بتصير خميس ربطتين وخميس أربع ربطات ولّا شو الترتيب؟ لك يا زلمة بتحس هالجدول متل جدول الحصص تبع ولاد الابتدائي.. نيالن يلي عندن حصتين ورا بعض!! ولك هزُلت... كلو مشان كيس نايلون.. والله عيب! لك رجعتونا للفانوس من قلة الكهربا، وبابور الكاز من قلة الغاز، والجلّة من قلة المازوت.. هلأ ح نرجع للسك وكيس الشبك مشان الخبز كمان.. بقيان الزربول والجزمة البلاستيك مشان الطرقات والمواصلات المعدومة..

الخبر يقول: «أكد مدير الحراج في وزارة الزراعة على أهمية الثروة الحراجية وضرورة حمايتها بقانون عصري متطور قابل للتنفيذ على أرض الواقع، وفق خصوصية كل منطقة، ضمن المحافظات السورية».
التعليق: ولك يعطيك ألف عافية يا قرة عين الشعب... بس جزء من الثروة الحراجية صارت حطب وانباعت للعالم وهلق عم يتدفو عليها... وجزء من الأراضي الحراجية انكسرت وصارت ملكيات خاصة.. رغم القانون موجود.. يعني يمكن القصة مو بالقانون، عصري ولا مو عصري.. باللي عم يطبقوه..

الخبر يقول: «محافظة دمشق لا يمكن دخول ومراجعة مديريات المحافظة إلا بعد إبراز وثيقة تلقي اللقاح ضد كورونا اعتباراً من 1/1/2022».
التعليق: كتير حلو الشعور يلي بيحسوا المواطن لما بتورجيه حكومته خوفها عليه والصراع من أجل إبقائه ع قيد الحياة والكورونا ما تقضي عليه.. لأن الهدف على ما يبدو هو القضاء عليه بالجوع والبرد والأمراض الأخرى يلي ما رح يقدر يتعالج منها بسبب غلاء أسعار الأدوية...

الخبر يقول: «أصدرت وزارة المالية القرار رقم ١٩٦٤ المتضمن تحويل ٢٢ مهنة من شريحة ضريبة الدخل المقطوع إلى شريحة ضريبة الأرباح الحقيقية اعتباراً من بداية العام القادم ٢٠٢٢».
التعليق: يا عيني يا عيني ع العنب الزيني... هاد القرار بيورجينا كيف وزارة المالية تحولت لوزارة جباية من الصغار.. باسم العدالة الضريبية.. بالمقابل لسا غالبية الحيتان الكبار خارج أيدي هالعدالة..