غلاف العدد 641

كل ما أجت الناس لتتفائل بجنيف بتجيك أخبار سيئة كتير عن مجزرة هون أو قصف هنيك.. وبتلاقي أنو القاعدين بالجولة التانية من جنيف2 راحوا يتماحكوا بينات بعضهم على إدانة واحدهم للمجزرة أو إدانة التاني للقصف.. ليتهرب كل واحد منهم من دوره بهي أو هاد.. ومن واجبو كمان بأنو يبحث جدياً بجنيف عن حل يكون مو بمصلحة واحد منهم مقابل التاني أول شي قد ما يكون بمصلحة السوريين يللي عم بيروحوا بين رجلينهم.. وكأنوا كل يللي راحوا ما بيكفو.. ما بين ما يصير الحل يللي جاية جاية متل ما كان هدول الطرفين نفسهم عم بيقولوا إنهم ما رح يتحاوروا أو «يتفاوضوا»..!

لك يا عمي.. والله نحنا حابين نشوف بلدنا عمرانة وقوية.. بمحبة ناسها أولاً.. بس يعني والله لازم تسمحولنا نعيش لنشوف بلدنا هيك..! يعني يللي بشوفكم ما بيعرف أنتو على شو دايرين؟ علينا؟ ولا ع الكراسي والمصاري؟ ولا ع البلد عنجد؟ الأولاني بيقول أنو مفوض من الشعب.. والتاني بيقول أنو هو بيمثل الشعب وقواه الحية والثورية.. مع أنو ما بيمثل حالو بالأساس.. بالوقت يللي مغيبة فيه بقية المعارضات وبقية المعارضين من الناس العاديين..!!

طيب وطالما كان يللي ع الطاولة لهلأ بس هدول الطرفين لحالهم ما رح نلاقي واحدهم مستعد يقول: وقف ليكو التاني عم يطرح قصة معقولة.. تعا نناقشها..؟! أو وينك.. ترى أنا كنت غلطان بهيك وأنت غلطان بهيك.. وخلينا نشوف الناس شو بدها!؟ وقبل ما تتعدل أمور جنيف رح يضل وضعكم مو مفهوم..! يعني مالكم شايفين أنو هاد الشعب يللي عم تحكو باسمو فيه موالي وفي معارض، وبقلب هدول الاتنين وبيناتهم في حدا فهمان القصة وفي مو فهمانها منيح.. يعني في ضايع بالقجعة وفي حدا عم بيساويها.. يعني في أشكال وألوان..؟! طيب ليش أنتو مصممين تتعاملوا معنا متل الروحة ع سوق الهال تبع بقديش ها الكوم أو الحِمل؟.. يعني ليش مصممين تتعاملوا معنا وكأنوا نحنا دوغما..؟

آخر تعديل على السبت, 15 شباط/فبراير 2014 19:31
(0 أصوات)