فيسبوكيات

- «تخيلوا نار جهنم بتشعل ع المازوت والغاز.. والمتعهدين سوريين.. قسماً بالله ليموتو الكفار من البرد».
وحول الخبر المنقول عن المركزي للإحصاء بأن «معظم السوريين غير آمنين غذائيا»، علق بعض المواطنين بما يلي:
- «بس غذائياً.. عندك مادياً ومعنوياً وكهربائياً ومائياً وبنزينياً ومازوتياً.. عدلك سيد راسي ولا بكفي هيك؟».
- «والأسعار في ارتفاع مستمر.. وجنوني!».
حول الخبر المتداول الذي يقول: «150 ليرة تكلفة نقل لتر بنزين الأوكتان 95 !» نورد بعض التعليقات عليه كما يلي:
- «إي كل لتر بصهريج عم يجي لأنو VIP ما بيركب حدا معو!!».
- «الصهريج بيسع ٤٠ ألف لتر يعني ٦ مليون أجور نقل من لبنان.. والله لو كان بDHL النقل كان أرخص!».
- «والله لو بتنقلو بالقطارة، مو هيك!».
وحول الخبر بأن «العقاري يوضح شروط منح قرض الترميم ويحدد ضمانته الوحيدة» نورد تعليق أحد المواطنين عليه:
- «ليش ما بتم إعطاء قرض لشراء أو ترميم البيوت الزراعية يعني كاتب عدل والضمان البيت يعني مو حقو مصاري لانو هذه البيوت أرخص وتستطيع فئة أكبر من الشراء».
خبر من صفحة الحكومة حول توصية اللجنة الاقتصادية باستيراد العجول بقصد تسمينها وذبحها.. نورد التعليق التالي من أحد المواطنين على نفس الصفحة:
- «كنا نتمنى من الحكومة إعادة النظر بإجراءات ترخيص حظائر التسمين المعقدة والطويلة والمكلفة وتسهيل حصول المربين على قروض من المصرف الزراعي الأكثر صعوبة... الحل في دعم الإنتاج والمربين وتشجيع إقامة حظائر التربية وليس الاستيراد.. يا أخي عجلوا القوانين ويسروها.. الناس استوت».
خبر آخر من صفحة الحكومة حول - «تكليف وزير الصحة الإسراع في تجهيز العيادات الشاملة في مدينة جرمانا لتكون نواة لإشادة مشفى عام حالما تتوفر الإمكانات اللازمة»، علق بعض المواطنين بما يلي:
- «القرار كان ع أساس مشفى وميزانيتو موجودة ولّا صار ضغط من المشافي الخاصة؟».
- «كانت مشفى صارت عيادات شاملة كرمال عيون مشافي جرمانا الخاصة... بكرا بتصير مستوصف..».
ونختم ببوست من إحدى الصفحات الشخصية تعليقاً على خبر نية حماية المستهلك القيام بتنظيم عمليات البيع والشراء عبر الإنترنت وفرض الحصول على سجل تجاري لمن يمارس العمل التجاري عبر الإنترنت، يقول:
- «يعني حماية المستهلك استكملت مهامها بالأسواق وكلو ع أحسن ما يكون وبقي تنظيم البيع والشراء عبر النت.. والأحلى موضوع السجل التجاري!!.. بقى سكرولي بسطات الفيس الله يرضى عليكم.. مابتعرفو مين ح يفوت ع صفحاتكم كبسة.. وخلو برصيدكم شوية لايكات للرشرشة وقت اللزوم..».
وناقل الكفر ليس بكافر.