فيسبوكيات

كان لمناسبة عيد الحب على فيسبوكيات هذا الأسبوع نكهة خاصة، بين الجدية والترويج والسخرية، وحتى التنديد، وبالطبع لم تغب هموم الحياة اليومية ومشاكلها التي انعكست كما هي العادة على الصفحات العامة والخاصة. 

ونفتتح فيسبوكياتنا ببوست معمم على الكثير من الصفحات الشخصية والعامة يقول:
- «عيد حب شو!؟.. الواحد من كتر الديون صار يشوف كلمة LOVE كأنها 1574».
على صفحة رئاسة مجلس الوزراء ورد خبر عن مشروع الادّخار السكني وفتح باب الاكتتاب على المساكن فيه، وقد ورد على الخبر الكثير من التعليقات، منها:
- «سلمونا البيوت اللي سجلنا عليها من 2004 بعدين افتحوا اكتتاب جديد».
- «والله حرام عليكن لسا تصرفو مليارات على بيوت 40 متر ووين بمناطق مقطوعة وبسعر قد راتب الموظف الدرجة الأولى بـ20 سنة بدون مايصرف منو شي ارحمو شوي هالمواطن المعتر شوي صغيرة بس».
وحول خبر تخصيص رئيس الحكومة ساعتين ونصف أسبوعياً للقاء المستثمرين الوارد على صفحة الحكومة، نورد بعض ما علق به بعض المواطنين:
- «أي هدول مستثمرين حقن... والموااااطن شو مشانوووو».
«والناس الدراويش.. خصص لهم كل يوم خمس دقايق.. ولا ما في وقت».
«والله فكرته بده يستقبل المواطنين الي ميتين من الجوع حتى يشوف شو وجعهم».
على إحدى الصفحات العامة ورد خبر عن مصدر في وزارة التموين حول سعر مادة الفروج الذي شهد ارتفاعاً بسبب زيادة نفقات التدفئة والأدوية ومستلزمات التربية..، وقد عقب بعض المواطنين بالتالي:
- «وهي الفروج طاااااار وعلا وعلا كتير، طبعاً أخواتو قبلو حلقوا بالعلالي، غاز (مابو)، مازوت هههههه نااااار ومفقود، بنزين شرحو شنو صار ذكي، طيب الدور عمين ياشاطرين، يلا اللي بعدو هاتوا لنشوف».
- «يعني عالسريع كل شغلة بتلاقولا مليون حجة ومليون تبرير أي وبعدين».
- «منيح إذا الصوص عم يتدفا وولادنا بلاهن».
إحدى الصفحات العامة نشرت خبراً حول أرباح سيريتل التي تتجاوز 58 مليار في 2018، وفيما يلي بعض تعليقات المواطنين عليه:
- «واحد معو بكلوريا أدبي حابب يعرف كم صفر بيطلعو هدول».
- «ياريت يتعلمو من شركات الاتصال التانية على طول عروض بتصب بمصلحة المشترك مو سرقتو».
«وأحلى شي لما بدق والشخص الثاني ما بيسمعك.. بكون سفقوا منك حق الدقيقة».
ونختم مع بوست معمم يقول:
- «اللي زعلان أنو رح يجي عيد الحب وما عندو حبيبة.. اتذكر أنو في عالم مر عليها عيد العمال وما عندا شغل»!.
وناقل الكفر ليس بكافر

آخر تعديل على الإثنين, 18 شباط/فبراير 2019 13:04