صفر بالسلوك

الطفل الوديع

• لقمان ديركي

بمناسبة ستين عاماً من الشتات

هي: شايف على عمايل الإسرائيليين ..

هو: مشان الله غيري لنا هالموضوع المعت..

هي: عن شو بدي أحكي..

هو: أي شي.. عن الطفولة مثلاً..

هي: آه والله.. جاي ع بالي أرجع بنت صغيرة.. وعيش هيك متل ولاد الأغنياء والمدعومين..

هو: ليش بقى؟!

هي: ما في أحلى من الطفولة.. براءة.. ولطافة.. وحلاوة..

هو: هلأ هيك صارت الطفولة.. أي في ولاد بيعوفوك حياتك من قد ما هنن غلاظ وتقلا..

هي: هي معك حق فيها.. لأو وشو أهلهم بيشوفهم أحلى وأذكى أولاد بالعالم..

هو: بتلاقي الضيوف دخلوا ع البيت وقعدوا.. وبعد شوي بيجوا الأب والأم أصحاب البيت وبيجيبوا ابنهم الغليظ مشان يستعرض مواهبه قدام الضيوف..

هي: وبيكون خجلان أول الشي.. بس الضيوف اللي عم بيزنوا على خراب عشهم بيشجعوه.. لحتى يبلش..

هو: وبيبلش..

هي: بيسلخهم نشيدة أول شي..

هو: بيقوموا الضيوف بيصفقوا له.. وبيبوسوه.. وبيدقوا ع الخشب.. وبيصلوا ع النبي.. وهي اللي بتفتح تمها وبتقول ياي ياي شو مهضوم.. وهاد اللي بيقول.. يسلملي شو أكبر من عمره..

هي: فـ.. بيتحمس الولد الثقيل وبيسلخهم غنية هالمرة..

هو: أخاصمك آه.. وبيصير يقلد نانسي عجرم..

هي: قام الضيوف بيفرطوا من الضحك وبيتعصوروا مشان يطلعوا الضحكة..

هو: وعلى ياي شو لذيذ.. وبيعقد.. وعلى بوسة من هون وقرصة من هون.. مشان يوقف..

هي: لأنه خلص.. بيكفي..

هو: وبتكون الخدامة جهزت الطاولة وقالت الأم للضيوف يشرفوا..

هي: بيقوموا بيشرفوا.. وبيقولوا للولد.. يا لله حبيبي تعال كول معنا مشان تنام..

هو: قام الولد بيقل له للضيف اخرس.. يا غليظ.. بيقوموا الضيوف بيضحكوا.. وبيصير الأب يقول للضيف.. حبك.. لو مو حابك ما بيقلك أخرس..

هي: قام الضيف بيرد له المحبة للولد وبيقعده بحضنه وبيلعب له بشعراته..

هو: طبعاً الطفل المهضوم رح يقله قيم إيدك عن شعراتي يا وسخ..

هي: وبيضحكوا أبوه وأمه على ظرافته..

هو: بس الأب بيقول للضيف وهو ميت من الضحك.. حبك.. خلص حبك..

هي: وفجأة.. بينزل الولد من حضنه للضيف وبيشده من الكرافة تبعه.. وبيسحبه.. لحتى يخليه ينزل ع الأرض ويمشي على أربعة..

هو: لأنو الزغير حبه.. وطبعاً رح يركب الزغير على ظهره للضيف.. ويقله حا..

هي: والضيوف؟!

هو: بيكون جمدوا.. لامن تمهم ولا من كمهم.. وكل واحد عم بيقول لحاله.. منيح اللي ما كنت أنا..

هي: وأبوه وأمه بيكونوا مبسوطين وعم يقولوا لأبنهم يحرق حريشك شو ملعون..

هو: والأب تحديداً عم يقله للضيف.. حبك.. العمى شو حبك..

بعد تفكير وتنهدات

هي: ما بتحس الولد الغليظ هادا بيشبه إسرائيل.. أبداً إسرائيل خنطق منطق..

مؤيداً

هو: وأبوه وأمه اللي عم يقولوا له برافو بيذكروك بأميركا..

هي: والضيوف.. بشو بيذكروك..

بشكل قاطع

هو: بالصمت العربي..

■■