_
11 كيلو لحمة بالشهر للعيلة

11 كيلو لحمة بالشهر للعيلة

* صباحو يا معلم.
- لك أهلين بأبو أحمد, امرني؟
* قطعلي وقيتين لحمة ناعمة زكاتك.
- شو والله طابشا اليوم؟
* خليا لربك هني هالكم مرة بالشهر, إي وسجلون عالحساب طبعاً.

- إي حافظ درسي... كلو صار يشتري اللحمة، بالوقية، وبالدين!
* إي شو متوقع يعني! تصورني مشتري لحمة متل ما لازم، مستحيل ما بتوفي! إنت بتعرف أديش لازمك لحمة بالشهر؟!
- شو حاسبن كالعادة... أديش!
* يا سيدي بيقولولك البني آدم بدو باليوم 75 غرام. خليه يكتر الجاجات، وياكل 50 غرام جاج، و25غرام لحمة... بيطلع بدك كيلو ونص جاج بالشهر وتلت رباع الكيلو لحمة, بالله احسبلي ياهن أديش بيكلفو بالشهر؟
- إذا قلنا كيلو العجل بـ4800 ليرة، وكيلو الجاج بـ1150, وشوية لحم غنم إذا قدرت تجيب, يعني بيطلعو 5600 ليرة بالشهر بالضبط، وهدول إلك لحالك.
* طيب وإذا بدنا نطعمي المرة والأولاد أديش بيطلعوا معك؟
- على 5 نفوس بالبيت، يعني بدك تجبلك 11 كيلو بالشهر، عالأقل فروجين كبار بالشهر من تبعات الـ 3 كيلو ونص، وتفوتلك أربعة كيلو لحمة عالبيت بالشهر، وهدول كلفتن 28 ألف ليرة.
* يعني تلت رباع راتبي, شفت هاد شكل واحد خرج يتغذى متل العالم والناس؟
- لكن عمرنا ما كنا ناكل لحمة!... إذا عهالحسبة لازم تكون حصة الواحد بالسنة 27 كيلو، إي ما حدا بكل الدني بياكل هيك!
* شو ما حدا! بطالعلك إياها السيرة؟ هات لنشوف أديش بياكل البني آدم لحمة بالسنة، اسمع شو عم يحكو...
يا سيدي عندك بأميركا الواحد بياكلو بحدود الـ 100 كيلو بالسنة، قول يا أخي هدول صريفة, شو بدنا منن، بس عندك البرازيل مثلاً 77 كيلو, كندا 70... لك الأردن يلي بلزقنا الواحد منن بيستهلك 36 كيلو لحمة بالسنة.
- إي وعنا؟!
* عنا... إي قبل الأزمة بالـ 2010، كان إذا بتجمع اللحمة وبتوزعها بالعدل، بيطلع لكل سوري 18 كيلو بالسنة: 10 لحمة و8 فروج، هيك بتقلك وزارة الزراعة، وبالـ 2017 كل واحد بسورية يفترض يطلعلوا حصة 17 كيلو بالسنة... يعني ما كتير فرقت، نحنا نقصنا صرنا 18 مليون، والدواب كمان قلّوا وضلينا راس براس تقريباً.
- والله إذا هيك يفترض ما تكون اللحمة غليت كتير!
* إي ليكا ما غليت كتير، بالجزيرة حق الخروف 40 ألف ليرة، بس لتوصلوا عالشام بيصير بـ 75 ألف! والفرق بيروح عالطريق «الشبيبة الطيبة» ما بيوفرو شي.
- بعدين كمان خط تهريب شغال عالخليج، وعلبنان... السنة الماضية حكوا إنو عم يبيعوا راس غنم العواس السوري بالخليج بحدود 166 ألف ليرة، بس بيهربولك بدالو لحم فروج تركي، تاكلو بعد ما يخم!
* يعني المهم حتى ناكل لحمة متل العالم والناس... لازم ما تتهرب ولا تتصدر، وفوقا لازم يزيد الإنتاج أكتر من النص، لحتى تقول إنو في لحمة تكفي الحد الأدنى للسوريين. والأهم إنو يكون فيك تشتريا!

 

الراتب 7 كغ لحمة!

* بتعرف بهالزمانات، بالخمسينات، كان يقيسوا أجرة الشغيل باليوم بكيلو لحمة غنم, يعني أقل راتب هديك الأيام كان 30 كيلو غنم بالشهر! بقى لو لسا ماشية هالحسبة، لازم تكون يوميتك بحدود الـ8000 ليرة والراتب بحيطان الـ250 ألف ليرة بالشهر!
- إي وشو راتبك اليوم، كم كيلو لحمة؟
* 7 كيلو، يعني بعد 70 سنة، صار راتب الشهر، متل راتب 7 إيام!

 

 

 

معلومات إضافية

العدد رقم:
909
آخر تعديل على الإثنين, 15 نيسان/أبريل 2019 12:17